 |
| Talanging Basa |
Atur panampi pasrah ( calon ) Temanten Kakung
Assalamu'alaikum wr wb
- Para sesepuh-pinisepuh ingkang dhahat kinabekten
- Panjenenganipun bapa Mujiyono minangka sulih sarira saking bapa Suwanta saha ibu Sumarni ingkang tuhu kinurmatan
- Para rawuh Kakung sumawana Putri ingkang bagya mulya
Kanti ngunjukaken raos syukur Alhamdulillah dumateng Alloh SWT, kula minangka talanging basa saking panjenenganipun Ibu Marni Lestari keparenga nanggapi atur menggah paring pangandikan pasrah saking kulawarga Bapa Suwanta sekalian ibu Sumarni
Ingkang sepisan minangkani punapa ingkang dados kersanipun ibu Marni Lestari dalasan sedaya kulawarga, ngaturaken pambagya sugeng rawuh panjenengan minangka duta saraya pasrah saking Bapa Suwanta sekalian ibu Sumarni sakpendherek , ingkang pidalem wonten ing dk Cageran RT 25 RW 09, Taskombang, Manisrenggo,Klaten.
Kaping kalih menggah salam taklim Bapa Suwanta sekalian lumantar panjenengan kula tampi , dhawah sami-sami kanti atur " Wa'alaikumusalam wr wb".
Wondene menggah keplasing sedya panjenengan hamasrahaken calon temanten kakung naninggih Bagus Widada Dwija Kuncara bin Bp Suwanta supados dipun ijab kabulaken daup kaliyan Rara Ayu Anna Oktariani Zulaika binti Bp Suwarto almarhum Ibu Marni Lestari sekeluarga hanampi kanti suka gembiraning manah lan Alhamdulillah sampun kaleksanaken kalawau enjang Ahad Pahing , surya kaping 7 Maret 2021 wantawis tabuh 08:20 WIB kanti lancar wonten ing Kadilajo Kecamatan Karangnongko Kabupaten Klaten.
Awit peparing sanggan majemukan arupi boga, busana, redana saha kencana lan sanes-sanesipun ingkang mujudaken tanda katresnan sarana ngraketaken pasedherekan saha kangge nyengkuyung lampahipun pahargyan dipun aturken matur nuwun mugi dados amal kesaenan panjenengan saha pikantuk piwales ingkang sakalangkung kathah barokah.
Panyuwun Bapa Suwanta sekalian bilih mbenjang dinten Rabu Kliwon, 10 Maret 2021 , kirang langkung tabuh 12:30 WIB nglarapaken temanten sarimbit saking Kadilajo tumuju dateng dalem Cageran, Taskombang , Manisrenggo kanti suka gembiraning manah Insyaa Alloh bade dipun leksanaaken.
Saklajengipun dumateng Bapa Suwanta sak pendherek kula aturi pinarak lenggah wonten papan ingkang sampun kasediaaken kanti mardikaning manah ,ngantos purnaning pahargyan saklebetipun swasana darurat pandemi covid 19 punika.
Panyuwunipun ibu Marni Lestari dalasan kulawarga mugi panjenengan sedaya kepareng paring donga pangestu dumateng putra temanten kekalih.Kanti pangajab mugi temanten sarimbit ingkang bade lumebet madyaning bebrayan agung tansah manggih bagya mulya dados keluarga ingkang sakinah mawadah warahmah.
Mbok bilih samangke pahargyan sampun purna , panjenengan sak rombongan bade pamit medal saking pasilan , Ibu Marni Lestari sak keluarga namung saget atur donga pangestu, mugi lampah panjenengan sak rombongan saking papan punika ngantos dumugi dalem sowang-sowang , manggih kawilujengan mboten wonten alangan setunggal punapa.
Ing wasana, mbok bilih anggen kula matur , hanampi saha nglenggahaken panjenengan sedaya kirang mranani ing panggalih , kula mawantu-wantu nyuwun agunging pangaksami.
Billahittaufiq wal hidayah
Wassalamu'alaikum wr wb
Kadilajo, 7 Maret 2021
Kiswanto
Tidak ada komentar:
Posting Komentar